«Golden Steyt Uorriors» yetakchilaridan biri Dreymond Grin «Chikago Bulls»ning Derrik Rouzning 1-raqamini abadiy muomaladan chiqarish qarorini izohladi.
«Bu qaror to‘liq haqli. Derrik Rouz Chikago uchun nihoyatda katta ahamiyatga ega. Rostini aytsam, bu shahar uchun Rouzdan muhimroq odam bo‘lmagan. Men Maykl Jordanni juda hurmat qilaman va unga hamma kabi qoyil qolaman. Lekin aynan Chikago uchun ahamiyati jihatidan Rouz hatto Jordanni ham ortda qoldiradi», — dedi Grin.
Uning so‘zlariga ko‘ra, Rouz shaharda ulkan ta’sirga ega: odamlar uni cheksiz hurmat qiladi, u qayerga bormasin, e’tibor markazida bo‘ladi. Jarohatlar uning faoliyatiga ta’sir qilgan bo‘lsa-da, Rouz NBA tarixidagi eng yosh MVP bo‘lib qoladi. Jordan ketgach tanazzulga yuz tutgan «Bulls» aynan Rouz tufayli yana umid va g‘alabaga ishonch topgan.
