Amerikalik bokschi va bloger Jake Paul sobiq og‘ir vazn jahon chempioni Anthony Joshuaga qarshi jangdan keyin yana jag‘ operatsiyasini o‘tkazganini ma’lum qildi.
Polning aytishicha, avvalgi jarrohlik amaliyotidan keyin asoratlar yuzaga kelgan. U ijtimoiy tarmoqlarda shunday yozdi: jag‘idagi vint va plastinalar bo‘shasha boshlagan, bunga esa so‘nggi ikki oy davomida yetarlicha dam olmagani sabab bo‘lgan.
Eslatib o‘tamiz, o‘tgan yil dekabr oyida Mayamida bo‘lib o‘tgan jangda Joshua oltinchi raundda nokaut orqali g‘alaba qozongan edi. Jangdan keyin Pol rentgen suratini e’lon qilib, jag‘i ikki joyidan singanini ko‘rsatgan, keyinchalik esa operatsiya muvaffaqiyatli o‘tganini bildirgan edi.
