Ўйинлардан биринчиси 9 октябр куни Тошкентда бўлиб ўтади.
Футбол бўйича Ўзбекистон миллий жамоаси октябр ойида Кувайт ва Уругвай миллий жамоаларига қарши ўртоқлик ўйинларида майдонга тушади.
Ўзбекистон футбол ассоциацияси хабарига кўра, Кувайтга қарши ўйин 9 октябр куни соат 18:00 да Тошкентдаги «Олимпия» стадионида бўлиб ўтади.
Олдинроқ ЎФА миллий жамоа 13 октябр куни Малайзия пойтахти Куала-Лумпурда Уругвайга қарши ўртоқлик учрашуви ўтказиши ҳақида хабар берганди.
Ўйинлар миллий жамоанинг ФИФА Жаҳон чемпионатига тайёргарлик доирасида ташкил этилмоқда.
Эслатиб ўтамиз, Ўзбекистон ЖЧ-2026 саралаши доирасида гуруҳда Эрондан кейинги иккинчи ўринни эгаллаб, ўз тарихида илк бор мундиалда иштирок этиш ҳуқуқини қўлга киритганди.
ФИФАнинг сентябр ойида эълон қилинган рейтингида Ўзбекистон миллий жамоаси бир поғонага юқорилаб, 1453,31 очко билан 54-ўринда қайд этилган. Миллий жамоа Осиёда Япония (19-ўрин, июлдаги рейтингдан 2 поғона пастлаган), Эрон (21, -1), Жанубий Корея (23, ўзгаришсиз), Австралия (25, -1) ва Қатардан (53, ўзгаришсиз) кейин 6-ўринда жойлашган.
