Англия терма жамоасининг собиқ мураббийи Гарет Саутгейт менежер ва бош мураббий тушунчалари ўртасидаги катта фарқ ҳақида фикр билдирди.
Унинг айтишича, менежер обрўсининг пасайиши йиллар давомида содир бўлган ва бу жараён футбол, техник ҳамда спорт директорларининг пайдо бўлиши билан тезлашган. Эндиликда улар узоқ муддатли стратегия учун жавоб беради ва кўпинча бош мураббийдан юқори туради.
Саутгейт бу эволюцияга қарши эмаслигини таъкидлаб, бош мураббийда контрактлар, скаутлик тармоқлари ва мураккаб таҳлилий тизимларни бошқариш учун вақт ва билим етишмаслигини айтди. Бироқ, масъулият камайгани сари, мураббий зиммасига кенг штаб, кучли медиа босими ва тижорий мажбуриятлар юкланмоқда.
«Бу шунчаки ном эмас. Менга Англия терма жамоасида “бош мураббий” лавозими таклиф қилинганда, мен уни “менежер” деб ўзгартиришни талаб қилганман», — дейди Саутгейт.
У LinkedIn профилида ўзини “Етакчи — менежер — мураббий” деб аташини ва бу онгли танлов эканини айтади:
• Етакчи — жамоа маданияти ва қарашларини шакллантиради;
• Менежер — одамлар ва манфаатларни бошқаради;
• Мураббий — майдондаги ўйин, тактика ва футболчилар ривожи билан шуғулланади.
Саутгейт фикрича, замонавий футболда айнан шу уч ролни бирлаштира олган менежерлар муваффақиятга эришади, чунки футболчилар — шунчаки доскадаги фигуралар эмас, балки инсонлардир.
