Аргентина терма жамоаси ҳамда “Интер Маями” клуби сардори Лионел Месси жароҳат олгани расман тасдиқланди. Бу ҳақда клуб матбуот хизмати маълум қилди.
Маълумотларга кўра, аргентиналик футболчи чап сон мушакларининг чўзилишидан азият чекмоқда. У ушбу жароҳатни 8 февраль куни Гуаякил шаҳрида ўтказилган мавсумолди тайёргарлик учрашувида олган. Ўша баҳсда “Интер Маями” Эквадорнинг “Барселона” клубига қарши майдонга тушиб, 2:2 ҳисобида дуранг ўйнаган эди. Месси эса учрашувда гол уриб, яна бир голли узатмага муаллифлик қилган.
Клубнинг расмий баёнотида айтилишича, футболчи 11 февраль куни ўтказилган ўйиндан сўнг машғулотларда иштирок этмаган. Текширувлар натижасида чап сон мушагининг чўзилгани тасдиқланган.
“Мессининг машғулотларга босқичма-босқич қайтиши унинг клиник ва функционал тикланишига боғлиқ. Тикланиш жараёни яқин кунларда баҳоланади”, — дейилади клуб хабарида
Эслатиб ўтамиз, 38 ёшли ҳужумчи 2023 йилдан буён “Интер Маями” сафида тўп сурмоқда. 2025 йил декабрь ойи бошида у жамоаси билан биргаликда MLS чемпионлигини қўлга киритган эди.
