Россиялик боксчи Руслан Проводников филиппинлик афсона Менни Пакяо билан эҳтимолий кўргазмали жанг ҳақидаги янгиликни жиддий қабул қилмаётганини айтди.
Аввалроқ ОАВда 47 ёшли собиқ жаҳон чемпиони Пакяо 18 апрель куни Лас-Вегасда Проводниковга қарши кўргазмали жанг ўтказиши мумкинлиги ҳақида хабарлар тарқалган эди. Ярим ўрта вазндаги баҳс 10 раундга мўлжаллангани айтилган.
Проводников бу хабарга шундай муносабат билдирди:
“Ҳозир бу ҳақда гапириш қийин, чунки мен учун буларнинг бари ҳазилга ўхшайди. Лас-Вегасда Менни Пакяо билан жанг? Эълон чиққан куни узоқ танишларим ҳам қўнғироқ қилди. Мен эса мени шунчаки ҳазиллашяпти деб ўйладим. Бу жанг ҳақида гапиришга ҳали эрта. Рингга ҳақиқатан ҳам Пакяога қарши чиқсам, шунда гапириш мумкин. Мен ҳар қандай таклифга очиқман. Агар бу жанг бўлса, фаолиятимдаги энг катта мўъжиза бўларди.”
Ҳозирча мазкур жанг расман тасдиқланмаган.
